هل نحن شعب سمكي المنشأ تطور من السمك بدل ما يتطور من القرد زي عمنا دارون ما قال على الرغم من أني واثق و مؤمن جداً بإننا خلقة الله سبحانه إلا إن مفيش مانع نتريق شوية على دارون أفندي بتاع نظرية التطور هوا و الواد إبن عمي اللي عمال بيربي في كتكوت من و هو في كي جي 2 و فاكر إنه هيتطور يبقى نسر و هوا في الجامعة و أهه إتخرج و هيتجوز و لسه أبوه بيغير الكتكوت من وراه لما بيموت عشان الواد ميتصدمش في دارون بيه.
لأ بجد هل الشعب المصري يمتلك ذاكرة السمكة و كل عشر ثواني بيمسح الهارد ديسك بتاعه و يبدأ يملاها من أول و جديد طب إزاي ده أنا لسه فاكر صور الشهداء و ملامحهم واحدة واحدة سالي زهران مثلاً و هي بشعرها و هي محجبة كريم بنونة و هو بلحيته الخفيفة و ضحكته الجميلة طارق زياد محمد و كتير أوي أوي إزاي بقى ناس تكون فاكرة الشهداء دوول و تتعامل كده عادي يعني كأن مفيش حاجة و يلا يا جماعة ثورة و خلصت أنا في رأيي المتواضع الشهداء دول أهم مية مرة من شهداء حرب أكتوبر قبل ما تقفش عليا أسمعني العملية نسبية بحتة بالنسبة لي و ربنا أعلم أنا شهداء أكتوبر معزتهم إيه في قلبي و كلهم على راسي من فوق بس شهداء أكتوبر رجعوا لينا سينا و شهداء يناير اللي رحلوا عنا في شهر يناير كما قال العبقري حمادة هلال رجعوا لنا مصر كلها بصحراء غربية بشرقية بوادي النيل بشواطيء البحرين أحمر و أبيض ده حتى كرامتنا اللي كانت ضايعة بين شعوب العالم رجعت لينا طب هتقولي إيه علاقة إنك فاكر بإننا شعب سمكي هقلك يا كبير بس إتقل معايا.
إزاي إحنا شعب عنده ذاكرة قريبة أوي بعيدة و منفهمش إن عدونا واحد و إننا لو أتحدنا عدونا هيقشعر و هيموت نفسه عشان يفرقنا.
إزاي بقى إحنا عندنا ذاكرة و بنقرأ في صفحات التاريخ و الجغرافيا و الأحياء و مش عارفين إن الفتنة الطائفية ممكن تدمر البلد و تودينا في ألف داهية كلنا و تلاقي خازوق طالع يقلك منبقاش رجالة لو محرقناش كل كنايس إمبابة و يطلع ميتين خازوق تانين قدام السفارة الأمريكية يقولوا عاوزين حماية دولية للأقباط و تلاقي شوية خوازيق من عين شمس معترضين على إن فيه كنيسة بتتبني مع إننا من شوية صغيرة أوي كنا كلنا في التحرير كل الأطياف و المعتقدات السياسية و الدينية و الكروية و بمناسبة الكروية أخبط دي.
إزاي يبقى عندنا ذاكرة و تلاقي الأخوة الزملكاوية بيهتفوا بإسم السافل و أخوه في المدرجات هتقولي إنت بتقول كده عشان إنت أهلاوي هقلك حمرا أنا قصدي فانلة الأهلي متفهمنيش صح لو سمحت و أقلك أنا بقول كده عشان دم الشهداء عندي أغلي من الأهلي و الزمالك و الهبل ده كله أنا بقول كده عشان السافل ده كان بيطالب الجيش إنه يمنع الأكل و الشرب و الأدوية عن المعتصمين الرجالة بجد اللي عندهم كرامة و متربيين أحسن مية مرة منه عشان يموتوا من الجوع و يروحوا و يسيبوا البلد تخرب السافل ده هوا و أخوه ليهم صورة و هما بيرشحوا جمال مبارك للرئاسة.
إزاي إحنا شعب عندنا ذاكرة و ماليزيا هي اللي تنقل تجربة محمد علي في مصر و تتحول لقوة إقتصادية جبارة و إحنا لسه بندور على رغيف عيش إزاي إحنا بنفهم و بنفكر و خالد الغندور لسه عمال بينشر الروائح الكريهة اللي خارجة من بقه عديها من بقه علينا كل يوم و هوا كان واخد دريم لحسابه أيام الثورة شتايم و إهانات و تليفونات ضد الثورة و الثوار و بعد ما الثورة نجحت لحس كلامه و عمال يتكلم دلوقتي عن حب مصر و الأخلاق و القيم هتقولي إنت بتكرهه عشان إنت أهلاوي هقلك راجع الرد أعلاه و الأدهي بقى من دول إننا نسينا تامر من غمرة حتى بعد المذيعة الجميلة بثينة كامل ما فضحته و قالت إسمه و نسينا هناء السمري و سيد علي لأ ده إحنا نسينا حسن راتب أحد كبار ممولي حملات الدعارة الإعلامية أثناء الثورة و كمان إيه حضر مؤتمر الحوار الوطني (مش عاوز ألفاظ قبيحة لو سمحتم).
إزاي عندنا ذاكرة و بنات طارق لسه مستنين أبوهم يرجع من عند ربنا عشان هوا وحاشهم أوي و سماح أنور لسه حية تُرزق هي و حسن يوسف و أحمد بدير و تامر نايتي قصدي حسني و زينة و يسرا يا عم أستنى إزاي عندنا ذاكرة و طلعت زكريا اللي مبيعرفش بشهادة مروة طالع يقول إنه كان مع الثورة مش ده اللي كان عاوز يضرب طلقتين في الهوا من الدبابة عشان الجبناء يجروا و المصريين لأ.
طب بالله عليكم حد يفهمني بجد إزاي إحنا عندنا ذاكرة و بنخش على جوجل و بنعمل سيرش بقى و عالم هاي تك و مش بنقرأ مثلاً عن الثورة الفرنسية و لا الثورة الألمانية طب بلاش حد قرأ مقال خالد الخميسي و اللي تحدث فيه إزاي الثورة الألمانية سنة 1919 فشلت بسبب الثورة المضادة طب بالذمة إحنا إتعلمنا حاجة من أي حاجة عدت علينا طب إزاي يبقى عندنا كل خريجين الجامعات دي و ميكونش عندنا أي ثقافة في أبسط حقوقنا و هي الحقوق السياسية إزاي عندنا ذاكرة و تلاقي الأخوان و الأخوات الليبراليين و الليبراليات العلمانين و العلمانيات بينقضوا نفسهم و كل طرف عمال بيخون في التاني و في الآخر على رأي سلفيوكوستا إحنا اللي بنحاسب على المشاريب في الآخر.
يا جدعان هتجنن حد يقولي بس إزاي عندنا ذاكرة أو أي نوع من أنواع الذكاء أو الثقافة و يحصل فينا كل اللي بيحصل فينا ده هوا للدرجة دي إحنا في التوهان لأ لو كده لازم نغير الصنف بقى مش هينفع كده و لا إيه رأيكم
ليست هناك تعليقات:
إرسال تعليق