خربتوا البلد

المُشكلة في الثوار إنهم مش قادرين يفهموا إنهم فعلاً خربوا البلد دلوقتي و في المقالة دي هوضحلكم هُما إزاي خربوا البلد:
1. نسبة الأمية في مصر قبل الثورة كانت كام كانت صفر مكنش فيه واحد أُمي فيكي يا بلد جت الثورة و بقت نسبة الأُمية كام بقت 28 و نص في المية يا رجالة هاتبقوا خربتوا البلد و لا لأ
2. مصر كان فيه نسبة أكادميين مرموقين و أبحاثهم العلمية مغرقة الدنيا عارف عددهم كان كام قبل الثورة كان أكتر من 300 ألف أكاديمي مرموق و ذو مكانة علمية عالية في مصر مغرقين البلد أبحاث و براءات إختراعات قولي بقى بعد الثورة فيه كام واحد منهم موجود و لا واحد كُلهم سابوا البلد بعد الثورة و هربوا ما إنتوا خربتوا البلد و مش عارفين.
3. مصر كان عندها إقتصاد قوي أوي أوي و كان نسبة دخل الفرد فيها تتجاوز 50 دولار في اليوم و كانت مية مية فوق خط الفقر دلوقتي عارفين النسبة وصلت كام بسببكم وصلت 41 في مية تحت خط الفقر و 41 في المية زيهم واقفين على الخط مش عارفين ينزلوا و لا يطلعوا و باين إنهم مكسلين و ال18 في المية اللي فاضلين سابوا البلد و راحوا يقعدوا في أي دولة مُستقرة سياسياً و إقتصادياً زي بوركينا فاسو و التشاد و النيجر.
4. مصر قبل الثورة كانت المكان الوحيد اللي البورصة مش بتخسر فيه و على طوول في صعود مُستمر مدفوع بقوى الأستقرار و الإستحمار اللي كانت سائدة وقتها دلوقتي البورصة اللي هي أصلاً سوق للمضاربة و ملهاش علاقة بالأقتصاد عمالة تنزل بعُنف شديد ها قولي بقى خربتوا البلد و لا لأ.
5. مصر على المستوي الرياضي كانت أوعي وشك 7 كاس عالم و 20 كاس أمم و ميداليات ذهبية بالعبيط مش عارفين نوديها فين دلوقتي و بعد الدول ما لقيتنا بنعمل ثورة راحوا شايلين مننا كُل الحجات دي و مش معترفين لينا غير بالجون بتاع مجدي عبد الغني اللي عمال يذلنا بيه لحد دلوقتي و هوا بنالتي سرقة من الأقرع اللي مكنش أقرع أوي ساعتها.
6. مصر قبل الثورة كانت هتنظم كاس العالم و الأوليمبيكيات الصيفية و الشتوية و اللي مستهوية بعد الثورة كُله أتسحب مننا يا معلم تبقوا خربتوا البلد و لا لأ يا عالم يا فاضية.
7. مصر كانت قبل الثورة قبلة السياحة في العالم و نسبة الإشغال رهيبة ده إحنا كُنا بنأجر الفندق بحماماته بمطباخه شاكب راكب بالشيئ الفلاني دلوقتي بعد الثورة الدول عمالة تبعتلنا في عيال بلطجية بيضربوا مولوتوف معمول من الأزايز البلاستيك شوفتوا بقى عملتوا إيه فينا يا بلطجية يا مُخربين.
8. هاتلي واحد كده أتحبس ظُلم قبل الثورة و لا حد أتعذب و لا حد أتقتل ظُلم في أمن الدولة اللي وحيد حامد ظلمه لما صوره في مُسلسل الجماعة و هوا أصلاً السجون بتاعته أنضف من الفورشيزون الشين مش خطأ مطبعي ده خطأ معلوماتي ناتج عن الثورة اللي خربت البلد خربتوا البلد حرام عليكم حرام عليكم.
9. قبل الثورة كانت الناس كُلها شغالة و مفيش حد قاعد في البيت ده أنا كُنت بشتغل تلات شُغلانات و لما كنت بلاقي نفسي فاضي كُنت بشتغل نفسي دلوقتي نسبة البطالة بقت رهيبة بسبب الثورة وصلت لمُعدلات غير مسبوقة حرام عليكوا خربتوا البلد.
10. قبل الثورة كان فيها ديمقراطية رهيبة و أحزاب كتيرة مُحترمة جت الثورة و حرقت مقر الحزب الوطني و عملت حالة فوضى بس مش خلاقة زي ما رايس هانم كانت بتقول دي فوضي خربت البلد.
11. مش لاقي حاجة تاني اقولها غير حرام عليكم خربتوا البلد اللي كانت من دول العالم الأول خليتوها من دول العالم العاشر خربتوا البلد
12. لو حد لقى الجادون في إزازة كوكاكولا يبقى يقابلني مكنش فيه اكتر منه زمان قبل الثورة جتكوا القرف خربتوا البلد