كلنا شوفنا الحلقة بتاعت عمرو مصطفى مع البنت الغريبة اللي دمها واقف في رموشها دي و كلنا ضحكنا و أتريقنا و قلنا في عمرو مصطفي اللي قاله مالك في الخمر و في عصير القصب كمان الكارثة إن كُلنا بنشوف توفيق عُكاشة الشخصية الأغرب على مدار التاريخ و اللي عشان هوا كويس مع مامته فقالت بدل قعدته في البيت أعمله قناة تليفزيونية فضائية و بدل ما هوا مصدع دماغي أخليه يصدع دماغ اللي بيتفرجوا عليه و يقضى على قدراتهم الإنجابية كمان طب أكيد شُفنا أحمد سبايدر و هو عبارة عن سبايدر مالوش علاقة بأحمد خالص لأن أحمد ده أسم راجل مش إسم سبايدر و أتريقنا و ضحكنا و عملنا كومنتات و ناس عملت لينا لايكات كتير أوي بس الكارثة إن...............................................................................
فيه ناس كتير أوي زي عمرو مُصطفى و توفيق عُكاشة و سبايدرمان و باتمان و دول مادة جميلة للسُخرية و الإندهاش من ضحالة الثقافة و التفكير و القدرات العقلية و للأسف فيه ناس كتير أوي أوي أوي بتصدق الناس دي و بتمشي وراها يعني شوية الشباب السيس اللي على الفيسبوك يتريقوا و يضحكوا علينا و كل مرة نُضيف إلى مُستمعينا ناس جديدة بتصدقنا و بتصدق اللي بنقوله الأمر اللي هيحصل معاه إننا نلاقي واحد زي اللي قتل فرج فودة كده القاضي يقله قاتلته ليه قاله عشان كافر قاله طب إنت عرفت من فين قاله الناس هي اللي بتقول عليه يعني الناس الغلابة اللي تعليمها على قدها و ثقافتها متواضعة عمال بيسمع بقى في كلام ليبرالية و علمانية و ماسونية و باتنجانية فالرجل حابب يعرف فيه إيه قوم يوقعه حظه المنيل تحت إيد عُكاشة أفندي صاحب أروع الإسقاطات السياسية في علم المهلبية عن دكر البط و حزمة الجرجير.
ممكن راجل زي ده الحماس ياخده و يروح يقتل البرادعي و شوية ناس من بتوع 6 إبريل و 7 إبريل و 8 كمان و يقلك الناس دي ماسونية كفرة و كلهم لابسيين حظاظات و تي شيرتات عليها أسد على رأسه تاج زي بتاع مانشستر يوناييتد , كده ممكن واحدة من الفتيات الهبيلات و ما أكثرهن تعيش ورا نجم النجوم اللي الفن في بحره بيعوم برنس الجيل و الجير كينج أوف نشا عمرو بيه مُصطفى و تروح بقى تقول هو زويل عمل إيه لمصر بنوبل هو نجيب محفوظ خد نوبل عشان كتب راوية ضد الدين هو البرادعي خد نوبل عشان دخل أمريكا العراق و بعدين تلاقي واحدة بتقول عبر مين قدك تروح ضربها بعربيتها أو تطلع تجري وراها و تقلها أشربي عرقسوس يا خاينة دي مصر.
الأهم و الأهم هو ليس كل هذا و لكن مُبارك فانز أو سانز أو ولاد الكلب حتى اللي عمالين يحضروا في كل حتة و يقولوا إزاي تهينوا رمز الدولة رمز العروبة رمز الصمود رمز المُحن الراجل ده عمل حجات كتيرة أوي لمصر و حجات مُهمة و مش بعيد يشغلوا أُغنية عمرو مُصطفى الأخيرة حافظ على ولاده و يقلك الدليل أهه إنه حافظ على ولاده لدرجة إن محدش عارف ولاده بقى عندهم كام في البنوك الأجنبية و العالمية لحد دلوقتي ولاد الكلب أو ولاد مُبارك مش كلهم واخدين فلوس و تي شيرتات منهم ناس بلا وعي بلا ثقافة بلا نظر للمظلومين و كل حاجة عندهم بتترجم إن الثورة هي السبب.
الإشارة طولت النهاردة في الطريق الله يخرب بيت الثورة - صحيوا من النوم متأخرين الله يخرب بيت الثورة - المية قطعت الله يخرب بيت الثورة - البوكسر ضاع الله يخرب بيت الثورة - التكييف مش شغال الله يخرب بيت الثورة - مسكوا حامية في تايلندا الله يخرب بيت الثورة.
طبعاً الناس دي محتاجة إنها تفهم محتاجة إنها تعرف محتاجة إنها تقرأ تتثقف تعرف إن الثورة ممسكتش الحُكم عشان تبقى هي اللي بوظت كل حاجة و عطلت المرور و وقفت عجلة الإنتاج و دمرت موارد الري و بوظت آلاف الأفدنة و سممت المواشي و لوثت مياه النيل و فجرت مفاعل فوكوشيما النووي في اليابان مش الثورة و الله و الأهم من ده كله إن الثورة بريئة تماماً من موضوع البوكسر اللي ضايع ده.
علمانين - ليبراليين كفرة و منافقين
مش عارف ليه الكلام ده بقى مُنتشر أوي أوي على لسان ناس من مُختلف الطبقات الفكرية و الثقافية و الإجتماعية و على الرغم من إنه مش من الظريف أو الصح إتهام حد بالكُفر أو النفاق لمجدر إنه عنده فكر مُعين إلا إن الناس عايشة حياتها عادي خالص لوز اللوز و الأدهي من كده إنهم مش بيتهموا أي من المشايخ اللي بيركبوا أي موجة و كل موجة بأي شيئ بل و على العكس دول بيدافعوا عنهم كأنهم مقالوش الكلام ده و الحجات دي أتعملت فوتوشوب على رأي عمرو مُصطفى على العموم أنا زهقت من الجدل إن الليبرالية ضد الإسلام و إن العلمانية مش عارف مالها و هقول كُل واحد عارف نفسه و عارف واجبات دينه يا ريت ربنا يقدرنا و نقوم بيها و نطلع من الدنيا دي على خير و تصبحوا على خير.
ليست هناك تعليقات:
إرسال تعليق